स्थानिक स्वराज्य संस्थांच्या निवडणुकीवर आज सर्वोच्च न्यायालयात महत्त्वाची सुनावणी

राज्यातील स्थानिक स्वराज्य संस्थांच्या निवडणुका केव्हा होणार, याबाबत आज (4 मार्च) सर्वोच्च न्यायालयात महत्त्वाची सुनावणी होणार आहे. यापूर्वीच्या तारखेला वेळेअभावी ही सुनावणी होऊ शकली नाही. त्यामुळे आज निकाल लागण्याची अपेक्षा आहे.

ओबीसी आरक्षणामुळे निवडणुका रखडल्या

       राज्यात अनेक ठिकाणी 3-4 वर्षांपासून स्थानिक स्वराज्य संस्थांच्या निवडणुका झालेल्या नाहीत. ओबीसी आरक्षणाचा विषय प्रलंबित असल्याने या निवडणुका पुढे ढकलण्यात आल्या आहेत. राज्य सरकारने सर्वोच्च न्यायालयात याचिका दाखल करून निवडणुका लवकर घेण्याची मागणी केली आहे. तर काही याचिकाकर्त्यांनी आधी ओबीसी आरक्षण निश्चित करावे आणि मगच निवडणुका घ्याव्यात, अशी मागणी केली आहे.

एप्रिल-मे महिन्यात निवडणुका होण्याची शक्यता

       मागील सुनावणीत सर्वोच्च न्यायालयाने दोन्ही बाजूंना आपली भूमिका स्पष्ट करण्यास सांगितले होते. राज्य सरकारने आपली बाजू मांडण्यासाठी 1 तास, तर याचिकाकर्त्यांनी अर्धा तास वेळ मागितला आहे. जर आजच्या सुनावणीत सर्व चर्चा पूर्ण झाली, तर निवडणुकांचा मार्ग मोकळा होईल आणि त्या एप्रिल-मे महिन्यात होऊ शकतात. पण, जर निर्णय लांबला, तर निवडणुकीची प्रक्रिया आणखी पुढे ढकलली जाण्याची शक्यता आहे.

     संपूर्ण राज्याचे लक्ष आता सर्वोच्च न्यायालयाच्या निर्णयाकडे लागले आहे.