सातारा पोलिसांची मोठी कारवाई; 449 हरवलेले आणि चोरीचे मोबाईल नागरिकांना परत

सातारा |

सातारा जिल्हा पोलिसांनी हरवलेले आणि चोरीस गेलेले मोबाईल शोधण्यासाठी राबवलेल्या विशेष मोहिमेला मोठे यश मिळाले आहे. CEIR (Central Equipment Identity Register) पोर्टलच्या मदतीने शोधण्यात आलेले 449 मोबाईल फोन संबंधित नागरिकांना परत करण्यात आले. या मोबाईलची एकूण किंमत सुमारे दीड कोटी रुपये असल्याची माहिती पोलिसांनी दिली.

कोल्हापूर परिक्षेत्राचे विशेष पोलीस महानिरीक्षक रंजनकुमार शर्मा यांच्या उपस्थितीत मोबाईल परत करण्याचा कार्यक्रम पार पडला. सातारा जिल्हा पोलीस दलाच्या वार्षिक निरीक्षण तपासणीदरम्यान ही कारवाई करण्यात आली.

14 हजारांहून अधिक तक्रारी

सातारा जिल्ह्यात 2024 ते सप्टेंबर 2026 या कालावधीत हरवलेल्या आणि चोरीस गेलेल्या मोबाईल फोनबाबत तब्बल 14,300 तक्रारी पोलिसांकडे दाखल झाल्या होत्या.

या तक्रारींमध्ये नमूद असलेल्या मोबाईलच्या IMEI क्रमांकाच्या आधारे पोलिसांनी तांत्रिक तपास सुरू केला. भारत सरकारच्या CEIR प्रणालीचा वापर करून वेगवेगळ्या ठिकाणी वापरात असलेल्या मोबाईलचा शोध घेण्यात आला.

या मोहिमेत आतापर्यंत 4,842 मोबाईल फोन नागरिकांना परत करण्यात आल्याचे पोलिसांनी सांगितले आहे.

CEIR पोर्टल ठरले महत्त्वाचे साधन

मोबाईल चोरी किंवा हरवल्यानंतर त्याचा गैरवापर होऊ नये तसेच संबंधित फोन शोधण्याच्या तपासात CEIR पोर्टलचा मोठा उपयोग झाला. IMEI क्रमांकाच्या माध्यमातून मिळालेल्या तांत्रिक माहितीच्या आधारे पोलिसांनी विविध प्रकरणांचा तपास पुढे नेला.

कायदेशीर प्रक्रिया पूर्ण केल्यानंतर सापडलेले 449 मोबाईल संबंधित तक्रारदारांच्या ताब्यात देण्यात आले.

वरिष्ठ अधिकाऱ्यांच्या उपस्थितीत मोबाईलचे वाटप

या कार्यक्रमाला सातारा जिल्ह्याचे पोलीस अधीक्षक निखिल पिंगळे, अपर पोलीस अधीक्षक डॉ. वैशाली कडुकर यांच्यासह पोलीस अधिकारी आणि कर्मचारी उपस्थित होते.

मोबाईल शोध मोहिमेचे यश हे सायबर पोलीस ठाणे तसेच जिल्ह्यातील विविध पोलीस ठाण्यांच्या अधिकारी आणि अंमलदारांच्या तांत्रिक तपासाचे फलित असल्याचे पोलिसांनी नमूद केले.

या कारवाईमुळे नागरिकांना त्यांचे मौल्यवान मोबाईल परत मिळण्यास मदत झाली असून, चोरी अथवा हरवलेल्या मोबाईलचा पुढील गैरवापर रोखण्यासही मदत होत आहे.

या पथकाने बजावली महत्त्वाची भूमिका

विशेष पोलीस महानिरीक्षक रंजनकुमार शर्मा, पोलीस अधीक्षक निखिल पिंगळे आणि अपर पोलीस अधीक्षक डॉ. वैशाली कडुकर यांच्या मार्गदर्शनाखाली ही मोहीम राबवण्यात आली.

सायबर पोलीस ठाण्याचे पोलीस निरीक्षक उत्तम भापकर, सहायक पोलीस निरीक्षक राजेश माळी, तसेच पोलीस निरीक्षक विश्वजीत घोडके आणि पोलीस अंमलदार प्रशांत मोरे, ओंकार डुबळ, संदीप पाटील, राकेश घाडगे, रामदास भास्करवाड, स्वप्नील शिंदे, किरण जगताप आणि प्रवीण फडतरे यांनी कारवाईत सहभाग घेतला.

उत्कृष्ट कामगिरीबद्दल संबंधित अधिकारी आणि कर्मचाऱ्यांचे वरिष्ठ पोलीस अधिकाऱ्यांनी अभिनंदन केले.