खनिज तेलाच्या दरातील घसरणीमुळे जागतिक बाजारात खळबळ; भारतासाठी दिलासादायक बातमी

अमेरिका आणि इराण यांच्यात गेल्या काही काळापासून वाढलेला तीव्र लष्करी तणाव आणि युद्धाच्या वातावरणामुळे जागतिक अर्थव्यवस्थेवर आणि बाजारावर प्रचंड दबाव निर्माण झाला होता. मात्र, आता अमेरिकेचे अध्यक्ष डोनाल्ड ट्रम्प यांनी अमेरिका इराणवरील आपले हल्ले थांबवत असल्याची अत्यंत महत्त्वपूर्ण घोषणा केल्यामुळे जगभरातून सुटकेचा श्वास सोडला जात आहे. या ऐतिहासिक निर्णयानंतर थेट आंतरराष्ट्रीय बाजारावर याचा सकारात्मक परिणाम पाहायला मिळाला असून, कच्च्या तेलाच्या दरांमध्ये तब्बल ६ टक्क्यांची मोठी घसरण नोंदवली गेली आहे. अमेरिका आणि इराणमधील या संघर्षामुळे होर्मुज खाडी परिसरातून होणारी जहाजांची वाहतूक आणि खनिज तेलाचा व्यापार धोक्यात आला होता, ज्यामुळे भारतासह जगभरात महागाईचा भडका उडाला होता आणि कच्च्या तेलाचे भाव गगनाला भिडले होते.

गेल्या काही दिवसांपासून अमेरिका इराणवर सलग मोठे हवाई हल्ले करत होती आणि होर्मुज खाडी पार करणाऱ्या सागरी जहाजांना लक्ष केले जात होते. प्रत्युत्तरात इराणनेही आखाती देशांमधील अमेरिकेच्या लष्करी तळांवर जोरदार हल्ले चढवल्यामुळे संपूर्ण मध्य पूर्व आशिया युद्धाच्या छायेत आला होता. या युद्धजन्य परिस्थितीमुळे जागतिक बाजारपेठेत मोठी अस्थिरता निर्माण झाली होती. परंतु, अमेरिकेने युद्ध थांबवण्याचे अधिकृत संकेत देताच जागतिक बाजारातील तणाव काहीसा कमी झाला असून, कच्च्या तेलाच्या किमतीत मोठी घट झाली आहे. सध्या आंतरराष्ट्रीय बाजारात आखाती देशांमधील कच्च्या तेलाचा व्यवहार ९१ डॉलर्सच्या आसपास सुरू असून अमेरिकन कच्च्या तेलाचा दर प्रति बॅरल ४४ डॉलर्स इतका नोंदवला गेला आहे. या घसरणीमुळे भारतसह सर्व विकसनशील देशांना मोठा आर्थिक दिलासा मिळाला असला, तरी दुसरीकडे डोनाल्ड ट्रम्प यांनी भारतावर १० टक्क्यांहून अधिक नवीन टॅरिफ (आयात शुल्क) लादल्याची नवी घोषणा केली आहे, ज्यामुळे आता अमेरिका आणि भारतामधील व्यापार धोरणांकडे संपूर्ण जगाचे लक्ष लागले आहे.