प्रशासकीय यंत्रणेत मोठे फेरबदल; ११ आयएएस अधिकाऱ्यांच्या बदल्या

मुंबई: महाराष्ट्र शासना कडून प्रशासकीय पातळीवर मोठे फेरबदल करण्यात आले असून, राज्यभरातील विविध जिल्ह्यांमध्ये आणि महत्त्वाच्या विभागांमध्ये तब्बल ११ सनदी अधिकाऱ्यांच्या (IAS Officers) बदल्या आणि नवीन नियुक्त्या करण्यात आल्या आहेत. या फेरबदलांमुळे ग्रामीण विकास, महावितरण आणि आदिवासी विकास प्रकल्पांच्या यंत्रणेला नवे नेतृत्व मिळाले असून, स्थानिक प्रशासनाला अधिक गतिशीलता देण्याच्या उद्देशाने हे पाऊल उचलण्यात आले आहे.

     या प्रशासकीय फेरबदलांमध्ये सिंधुदुर्ग जिल्हा परिषदेचे मुख्य कार्यकारी अधिकारी म्हणून काम पाहणारे रवींद्र खेबुडकर यांची पुणे येथील भूजल सर्वेक्षण व विकास यंत्रणेच्या (GSDA) आयुक्तपदी बदली करण्यात आली आहे. त्यांच्या जागी जव्हारच्या एकात्मिक आदिवासी विकास प्रकल्पाचे प्रकल्प अधिकारी म्हणून कार्यरत असलेल्या डॉ. अपूर्वा बासुर यांची सिंधुदुर्ग जिल्हा परिषदेच्या सीईओ पदी नियुक्ती झाली आहे. याशिवाय, पुणे जीएसडीएचे आयुक्त गजेंद्र बावणे यांची छत्रपती संभाजीनगर येथील महावितरणचे संयुक्त व्यवस्थापकीय संचालक म्हणून महत्त्वपूर्ण पदावर वर्णी लागली आहे. डहाणू येथील एकात्मिक आदिवासी विकास प्रकल्पाचे प्रकल्प अधिकारी विशाल खत्री यांची यवतमाळ जिल्हा परिषदेचे मुख्य कार्यकारी अधिकारी म्हणून प्रशासकीय सूत्रे हाती देण्यात आली आहेत.

        प्रशासकीय कामकाजात युवा अधिकाऱ्यांचा सहभाग वाढवण्यासाठी अनेक उपविभागीय व सहाय्यक जिल्हाधिकारी स्तरावरील अधिकाऱ्यांच्याही बदल्या करण्यात आल्या आहेत. यामध्ये नांदेडच्या अधिसंख्य सहाय्यक जिल्हाधिकारी डोनुरू अनन्या रेड्डी यांची डहाणूच्या एकात्मिक आदिवासी विकास प्रकल्पाच्या प्रकल्प अधिकारीपदी नियुक्ती करण्यात आली आहे, तर नाशिकचे पी. के. सिद्धार्थ रामकुमार यांची जव्हार येथे याच पदावर नेमणूक झाली आहे. नागपूरचे कुश मोटवानी यांची वर्धेचे सहाय्यक जिल्हाधिकारी तथा उपविभागीय अधिकारी म्हणून जबाबदारी सोपवण्यात आली आहे. वाशिमचे आकाश वर्मा यांना चंद्रपूर जिल्ह्यातील गोंडपिंपरीचे सहाय्यक जिल्हाधिकारी म्हणून नियुक्त केले असून, गोंदियाचे नंदला साईकिरण यांची भंडारा येथे सहाय्यक जिल्हाधिकारी म्हणून बदली झाली आहे. यासोबतच हिंगोलीचे योगेश कुमार मीना यांची जळगावचे सहाय्यक जिल्हाधिकारी तथा उपविभागीय अधिकारी म्हणून आणि नंदुरबारचे शिवांश सिंह यांची गडचिरोली जिल्ह्यातील अहेरी येथील एकात्मिक आदिवासी विकास प्रकल्पाचे प्रकल्प अधिकारी तथा सहाय्यक जिल्हाधिकारी म्हणून नियुक्ती करण्यात आली आहे.

      प्रशासकीय सेवेमध्ये अशा प्रकारे होत असलेल्या नव्या नियुक्त्यां सोबतच, देशभरातून यूपीएससी परीक्षेत यश मिळवून सर्वोच्च स्थान पटकावणारे अनुज अग्निहोत्री यांच्यासारखे तरुण अधिकारी आपल्या आईच्या प्रेरणेने समाजसेवेचा वसा कसा घेत आहेत, याची चर्चाही प्रशासकीय वर्तुळात रंगली आहे. समाजासाठी काहीतरी चांगले करण्याची आणि सकारात्मक बदल घडवण्याची प्रेरणा आईकडून मिळाल्याचे सांगत, योग्य दिशा ठरवून केलेले कठोर परिश्रम कसे फळाला येतात, हे अशा अधिकाऱ्यांच्या प्रवासातून दिसून येते. या सर्व नवोदित आणि अनुभवी अधिकाऱ्यांच्या समन्वयामुळे राज्यातील शासकीय योजनांची प्रभावी अंमलबजावणी होऊन विकास कामांना अधिक वेग येईल, अशी अपेक्षा व्यक्त केली जात आहे.