डीजेबंदी वरून नितेश राणे आक्रमक; दांडियातील प्रवेश बंदीच्या मागणीने वाद
मुंबई: डीजेच्या वापरावर आणि धार्मिक सणांच्या आयोजना वरून राज्यात सुरू असलेल्या वादात भारतीय जनता पक्षाचे आमदार नितेश राणे यांनी अत्यंत आक्रमक भूमिका मांडली आहे. सनातन हिंदू धर्म आणि संतांच्या अपमाना वरून विरोधकांवर निशाणा साधत त्यांनी नवरात्रोत्सवातील गरबा व दांडिया कार्यक्रमां मध्ये मुस्लिम तरुणांच्या प्रवेशावर पूर्णपणे बंदी घालण्याची जोरदार मागणी केली आहे. इतर धर्मीयांच्या विशिष्ट धार्मिक कार्यक्रमांमध्ये जशी बाहेरील व्यक्तींना प्रवेशास परवानगी नसते, त्याच धर्तीवर दांडियाच्या कार्यक्रमां मध्येही कडक नियमावली लागू केली जावी, अशी आग्रही भूमिका त्यांनी घेतली आहे.
सार्वजनिक सणांच्या निमित्ताने वाजवल्या जाणाऱ्या डीजे आणि ध्वनीक्षेपक बंदीच्या मुद्द्यावर बोलताना नितेश राणे यांनी नियमां मधील समानतेचा मुद्दा उपस्थित केला. जर ध्वनी प्रदूषणाचा किंवा त्रासाचा मुद्दा पुढे करून केवळ हिंदू सणांच्या वेळीच डीजे आणि वाद्यांवर निर्बंध आणले जात असतील, तर तीच कठोर नियमावली ईदच्या मिरवणुकांवरही लागू झाली पाहिजे, असे त्यांनी स्पष्ट केले. ईदच्या जुलूसवेळी किंवा मिरवणुकीतही एकानेही डीजे वाजवला नाही पाहिजे, अशी मागणी करत त्यांनी प्रशासकीय धोरणात दुजाभाव नसावा, अशी अपेक्षा व्यक्त केली. उपमुख्यमंत्र्यांनी सांस्कृतिक पद्धतीने सण साजरे करण्या बाबत मांडलेल्या भूमिकेचे समर्थन करत त्यांनी सर्व धर्मीयांसाठी नियम समान असावेत, असा पुनरुच्चार केला.
यावेळी बोलताना त्यांनी काही धर्मगुरू आणि वक्त्यांवर अत्यंत कडक शब्दांत ताशेरे ओढले. महिलांच्या बाबतीत अपशब्द वापरणारे आणि चिथावणीखोर विधाने करणारे घटक मोकाट असताना सनातन हिंदू धर्म, परंपरा आणि संतांना सातत्याने टार्गेट केले जात असल्याचा गंभीर आरोप त्यांनी केला. केवळ हिंदू धर्मालाच वारंवार सल्ले देणाऱ्या विरोधकांनी व संबंधितांनी हिंमत असेल तर इस्लाम आणि कुराण संदर्भातही अशाच स्पष्टोक्तीने बोलून दाखवावे, असे खुले आव्हान त्यांनी दिले. दिवंगत शिवसेना प्रमुख बाळासाहेब ठाकरे यांच्या धडाडीचे स्मरण करत त्यांनी धर्म रक्षणासाठी अशीच रोखठोक भूमिका घेण्याची गरज असल्याचे नमूद केले. त्यांच्या या वादग्रस्त आणि आक्रमक वक्तव्यामुळे राजकीय वर्तुळात पुन्हा एकदा मोठा गदारोळ उडण्याची शक्यता वर्तवली जात आहे.
