जयकुमार गोरे यांच्या दहीवडीतील निवासस्थानी बाप्पा विराजमान; सुख-समृद्धीसाठी प्रार्थना

दहीवडी: भाद्रपद शुद्ध चतुर्थीच्या पावन आणि मंगलमय मुहूर्तावर संपूर्ण महाराष्ट्रात लाडक्या बाप्पाचे अत्यंत चैतन्यमय वातावरणात आगमन झाले असून, राज्यभरात उत्सवाचा उत्साह ओसंडून वाहत आहे. याच मांगल्याच्या वातावरणात राज्याचे ग्रामविकास मंत्री जयकुमार गोरे यांच्या माण तालुक्यातील बोराटवाडी येथील निवास स्थानीही विघ्नहर्त्या श्री गणेशाची अत्यंत श्रद्धापूर्वक आणि वाजत-गाजत प्रतिष्ठापना करण्यात आली आहे. ‘गणपती बाप्पा मोरया’चा जयघोष, ढूल-ताशांच्या गजरात आणि मंगल वाद्यांच्या स्वरांमध्ये मंत्री जयकुमार गोरे यांनी आपल्या कुटुंबियांसह लाडक्या बाप्पाचे मनोभावे स्वागत केले, ज्यामुळे संपूर्ण परिसरात एक वेगळाच आनंदाचा माहोल निर्माण झाला होता.

         वैदिक मंत्रोच्चार आणि पारंपरिक धार्मिक विधींच्या साक्षीने श्री गणेशाच्या मूर्तीची अत्यंत विधिवत स्थापना करण्यात आली. यानंतर उपस्थित भाविक, ग्रामस्थ, हितचिंतक आणि कार्यकर्त्यांच्या उपस्थितीत श्रींची आरती अत्यंत भक्तीभावात संपन्न झाली. दरवर्षी प्रमाणे यंदाही मंत्री जयकुमार गोरे यांच्या निवासस्थानी गणेशोत्सवामुळे एक वेगळाच उत्सवमय माहोल पाहायला मिळत आहे. बाप्पाच्या आगमनाची माहिती मिळताच परिसरातील स्थानिक नागरिक, विविध क्षेत्रातील पदाधिकारी आणि कार्यकर्ते मोठ्या संख्येने दर्शनासाठी उपस्थित राहत असून, संपूर्ण बोराटवाडी परिसर भक्तीच्या सांदर्यात दुमदुमून गेला आहे.

       या पवित्र प्रसंगी ग्रामविकास मंत्री जयकुमार गोरे यांनी समस्त महाराष्ट्रवासियांना गणेशोत्सवाच्या हार्दिक शुभेच्छा दिल्या. विघ्नहर्ता श्री गणेशाच्या असीम कृपेने राज्यातील शेतकरी, कष्टकरी, महिला आणि सर्वसामान्य जनतेच्या आयुष्यातील सर्व प्रकारची संकटे दूर होवोत, अशी आर्त प्रार्थना त्यांनी केली. तसेच, राज्यात सर्वत्र सुख, समृद्धी, ऐश्वर्य आणि शांतता नांदो, यासोबतच ग्रामविकासाच्या माध्यमातून राज्याच्या तळागाळातील शेवटच्या घटकापर्यंत विकासाचा प्रकाश यशस्वीपणे पोहोचवण्याचे बळ लाडक्या बाप्पाने आम्हा सर्वांना द्यावे, अशी सदिच्छा त्यांनी यावेळी व्यक्त केली. बाप्पाच्या या मंगल आगमनामुळे गोरे यांच्या निवास स्थानी आणि संपूर्ण माण तालुक्यात आनंदाचे व उत्साहाचे वातावरण पसरले आहे.