दिल्लीतील आंदोलनावरून शिंदे आक्रमक! राहुल गांधींवर लावले गंभीर आरोप
मुंबई: दिल्लीत पंतप्रधान नरेंद्र मोदी यांच्या निवासस्थानाबाहेर काँग्रेस नेते राहुल गांधी आणि प्रियंका गांधी यांनी केलेल्या ठिय्या आंदोलनानंतर देशातील राजकीय वातावरण चांगलेच पेटले आहे. या आंदोलनावर राज्याचे उपमुख्यमंत्री एकनाथ शिंदे यांनी अत्यंत आक्रमक शब्दांत प्रतिक्रिया देत राहुल गांधी यांच्यावर जोरदार हल्लाबोल केला आहे. अतिशय संवेदनशील मानल्या जाणाऱ्या पंतप्रधानांच्या निवासस्थानाबाहेर आंदोलन करून राहुल गांधी यांना नक्की काय साध्य करायचे होते, त्यांना पंतप्रधान मोदींचा घातपात करायचा होता का, असा थेट आणि सनसनाटी सवाल एकनाथ शिंदे यांनी उपस्थित केला आहे.
दिल्लीतील जंतर-मंतरवर ‘नीट‘ पेपरफुटी प्रकरणी सुरू असलेल्या आंदोलनादरम्यान पोलिसांनी केलेल्या लाठीचाराच्या निषेधार्थ काँग्रेसने हे आंदोलन केले होते. राहुल गांधी यांनी पंतप्रधान मोदी यांच्या निवासस्थानाबाहेर तब्बल तीन तास ठिय्या मांडला होता, ज्यानंतर पोलिसांनी त्यांना ताब्यात घेतले. या घटनेचा तीव्र निषेध नोंदवत एकनाथ शिंदे म्हणाले की, राहुल गांधी हे विरोधी पक्षनेते पदासारख्या अत्यंत जबाबदार घटनात्मक पदावर कार्यरत आहेत. एवढ्या महत्त्वाच्या पदावर असताना त्यांनी केलेले हे आंदोलन पूर्णपणे बेजबाबदारपणाचे आणि देशात अराजकता पसरवणारे आहे. ज्या ठिकाणी आंदोलनाला सक्त मनाई आहे, अशा ठिकाणी जाऊन लोकांना गोळा करण्याचा प्रयत्न करणे ही अत्यंत गंभीर बाब असल्याचे शिंदे म्हणाले.
दुसरीकडे, या सर्व घडामोडींनंतर राहुल गांधी यांनी पत्रकार परिषद घेत केंद्र सरकारवर पुन्हा एकदा जोरदार प्रहार केला. केंद्रीय शिक्षणमंत्री धर्मेंद्र प्रधान यांनी आपल्या पदाचा तत्काळ राजीनामा द्यावा, आंदोलक विद्यार्थ्यांवर लाठीचार्ज करणाऱ्या पोलिसांवर कठोर कारवाई करण्यात यावी आणि पंतप्रधान नरेंद्र मोदी यांनी या संपूर्ण प्रकाराबद्दल देशवासीयांची माफी मागावी, अशी ठाम मागणी राहुल गांधी यांनी केली आहे. या आरोप-प्रत्यारोपांमुळे केंद्र सरकार आणि विरोधी पक्षांमधील संघर्ष आता विकोपाला पोहोचला आहे.
