बारामतीत लाचखोर अधिकाऱ्याला बेड्या! ४ लाखांची रोकड स्वीकारताना ट्रॅफिक कंट्रोलर एसीबीच्या ताब्यात

बारामती: पुणे जिल्ह्यातील बारामती एसटी आगारात लाचलुचपत प्रतिबंधक विभागाने (ACB) एक मोठी आणि धडक कारवाई करत लाचखोर अधिकाऱ्याचे पितळ उघडे पडले आहे. बारामती एमआयडीसी येथील वाहतूक नियंत्रक तसेच एसटी को-ऑपरेटिव्ह बँकेचे संचालक मंडळ सदस्य अनिल तुकाराम बनकर (वय ५१) याला तक्रारदाराकडून तब्बल ४ लाख रुपयांची भलीमोठी लाच स्वीकारताना एसीबीच्या पथकाने रंगेहात बेड्या ठोकल्या आहेत.

मिळालेल्या माहितीनुसार, तक्रारदाराचे एसटी ड्रायव्हर को-ऑपरेटिव्ह बँकेशी संबंधित थकीत बिल मंजूर करून देण्याच्या मोबदल्यात आरोपी बनकर याने सुरुवातीला चक्क १० लाख रुपयांच्या लाचेची मागणी केली होती. त्यानंतर झालेल्या तडजोडीअंती ५ लाख रुपयांवरून ४ लाख रुपये स्वीकारण्याचे निश्चित झाले. लाचेची ही रक्कम वसूल करण्यासाठी आरोपीने बारामती एसटी स्थानक परिसरात भेटण्याचे ठरवले होते. या प्रकरणी तक्रारदाराने पुणे एसीबीकडे धाव घेऊन तक्रार दाखल केली होती.

तक्रारीची पडताळणी केल्यानंतर लाचलुचपत प्रतिबंधक विभाग, पुणे यांच्या मार्गदर्शनाखाली २३ जुलै रोजी सायंकाळच्या सुमारास बारामती एसटी बसस्थानक परिसरात अत्यंत नियोजनबद्ध सापळा रचण्यात आला. आरोपी अनिल बनकर याने आपल्या चारचाकी वाहनात बसून तक्रारदाराकडून ४ लाख रुपयांची रोकड स्वीकारताच दबा धरून बसलेल्या एसीबीच्या अधिकाऱ्यांनी त्याला जागीच ताफ्यात घेतले आणि रोख रक्कम जप्त केली. पोलीस निरीक्षक सचिन पाटील आणि सहाय्यक पोलीस निरीक्षक गजानन कोंडे यांच्या नेतृत्वाखाली ही कारवाई पार पडली असून आरोपीविरोधात बारामती शहर पोलीस ठाण्यात भ्रष्टाचार प्रतिबंधक कायद्यानुसार गुन्हा नोंदवण्याची प्रक्रिया सुरू आहे. या थेट कारवाईमुळे एसटी महामंडळ आणि बारामती परिसरात तीव्र खळबळ उडाली आहे.