विश्रांतवाडीत संतापजनक घटना; दारूसाठी पैसे न दिल्याने मुलाकडून आईची हत्या

पुणे: पुण्यातील विश्रांतवाडी परिसरातील शांतीनगर वसाहतीत एक अत्यंत हादरवून टाकणारी आणि अंगावर काटा आणणारी घटना उघडकीस आली आहे. दारू पिण्यासाठी आईने पैसे देण्यास स्पष्ट नकार दिल्याने एका नराधम मुलाने आपल्याच सख्या आईला बेदम मारहाण करून तिचा खून केल्याची दुर्दैवी घटना शनिवारी रात्री घडली. या अत्यंत संतापजनक प्रकरणी विश्रांतवाडी पोलिसांनी त्वरित कारवाई करत आरोपी मुलाला बेड्या ठोकल्या असून, या घटनेमुळे पुणे शहर आणि परिसरात तीव्र संताप व्यक्त होत आहे.

        सविता सुरेश हरिभक्त (वय ४८, रा. शांतीनगर वसाहत, विश्रांतवाडी) असे खून झालेल्या दुर्दैवी मातेचे नाव असून, अनिकेत हरिभक्त (वय ३०) असे अटक करण्यात आलेल्या आरोपी मुलाचे नाव आहे. पोलिसांनी दिलेल्या सविस्तर माहिती नुसार, मृत सविता या त्यांच्या पती, दोन मुले आणि एक मुलगी यांच्यासह शांतीनगर वसाहतीत राहत होत्या. आरोपी अनिकेत हा काहीही कामधंदा करत नव्हता. त्याचा विवाह झाला असला, तरी त्याची पत्नी व मुलगा त्याच्यासोबत राहत नव्हते. कुटुंबातील इतर सदस्य मोलमजुरी करून आपला उदरनिर्वाह चालवत होते, तर त्याचे वडील सुरक्षारक्षक म्हणून नोकरी करतात. अनिकेतच्या सततच्या दारूच्या व्यसनामुळे आणि अनुत्पादक जीवन शैलीमुळे कुटुंबात नेहमीच वाद होत असत.

      शनिवारी रात्रीच्या सुमारास मृत सविता आणि आरोपी मुलगा अनिकेत यांच्यामध्ये पुन्हा एकदा वाद झाला. अनिकेत याने नेहमी प्रमाणे दारू पिण्यासाठी आईकडे पैशांची मागणी केली. मात्र, तो काहीही काम करत नसल्याने आणि त्याच्या त्रासाला कंटाळलेल्या सविता यांनी त्याला पैसे देण्यास सक्त नकार दिला. या नकाराची राग आल्यामुळे संतापलेल्या अनिकेतने हिडीस प्रकार करत आईला बेदम मारहाण केली. या अमानुष मारहाणीत सविता गंभीर जखमी होऊन रक्ताच्या थारोळ्यात खाली कोसळल्या.

      या गंभीर प्रकाराची माहिती मिळताच तातडीने ११२ क्रमांका वरून पोलिसांना नियंत्रण कक्षातून वर्दी देण्यात आली. विश्रांतवाडी पोलीस ठाण्याचे पथक अवघ्या काही वेळात घटना स्थळी दाखल झाले आणि गंभीर जखमी झालेल्या सविता यांना त्वरित उपचारासाठी जवळच्या रुग्णालयात हलवण्यात आले. मात्र, रुग्णालयात पोहोचण्या पूर्वीच त्यांचा मृत्यू झाल्याचे डॉक्टरांनी घोषित केले. पोलिसांनी घटनेचे गांभीर्य लक्षात घेत तात्काळ आरोपी अनिकेत याला ताब्यात घेतले. सुरुवातीला तो पोलिसां समोर उडवा उडवीची उत्तरे देऊन दिशाभूल करण्याचा प्रयत्न करत होता, परंतु पोलिसी खाक्या दाखवताच त्याने दारूसाठी पैसे न दिल्यामुळेच आपण आईला मारहाण केल्याची कबुली दिली. मध्यरात्री पोलिसांनी त्याला औपचारिकरीत्या अटक केली असून, वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली या प्रकरणाचा पुढील सखोल तपास सुरू आहे.