सततच्या वाढीनंतर अखेर सोन्याचे भाव आपटले; १५ दिवसांच्या मंदीनंतर सोन्याची नवीन किंमत जाहीर
जळगाव: गेल्या काही दिवसांपासून सातत्याने उच्चांकी पातळी गाठत असलेल्या सोनेप्रेमींसाठी एक मोठी आणि दिलासादायक बातमी समोर आली आहे. सतत वाढत जाणाऱ्या सोन्याच्या किंमतींना आता मोठा ब्रेक लागला असून, सोन्याच्या भावात मोठी घसरण पाहायला मिळत आहे. एकेकाळी प्रति तोळा १ लाख ७० हजार रुपयांच्या जवळपास पोहोचलेला सोन्याचा भाव आता घसरून थेट दीड लाखांच्या खाली आला आहे, ज्यामुळे ग्राहकांना काहीसा दिलासा मिळाला आहे. जळगावच्या प्रसिद्ध सराफा बाजारातून मिळालेल्या माहितीनुसार, मागील पंधरा दिवसांपासून सोन्याच्या दरात सतत घसरण होण्याचा ट्रेंड सुरू आहे.
जळगाव सराफा बाजारात आज सोन्याच्या दरात प्रति तोळ्यामागे तब्बल १,५०० रुपयांची घसरण नोंदवली गेली आहे. या ताज्या घसरणीनंतर आता जळगाव बाजारात सोन्याचे दर जीएसटीसह प्रति तोळा १ लाख ४७ हजार २९० रुपयांवर आले आहेत. आंतरराष्ट्रीय पातळीवर घडणाऱ्या विविध घडामोडींचा आणि जागतिक बाजारपेठेतील बदलांचा थेट परिणाम सोन्याच्या किंमतींवर होत असल्याचे येथील सराफा व्यावसायिकांनी स्पष्ट केले आहे. सोन्याच्या तुलनेत चांदीच्या दरांमध्ये मात्र सध्या कोणतीही मोठी उलथापालथ झालेली नाही. चांदीचे भाव पूर्णपणे स्थिर असून त्यात ना वाढ झाली आहे ना घट नोंदवली गेली आहे. जळगाव सराफा बाजारात सध्या चांदीचे दर जीएसटीसह प्रति किलो २ लाख ३१ हजार ७५० रुपये एवढे स्थिर असल्याचे दिसून येत आहे.
