मेडिकल-मेयोतील विकासकामांना गती; फडणवीसांकडून सर्पदंशग्रस्त बालिकेची आस्थेने विचारपूस

नागपूर: शासकीय वैद्यकीय महाविद्यालय व रुग्णालय (मेडिकल) तसेच इंदिरा गांधी शासकीय वैद्यकीय महाविद्यालय व रुग्णालय (मेयो) येथे सुरू असलेल्या विविध विकास कामांची आणि अत्याधुनिक आरोग्य सुविधांची मुख्यमंत्री देवेंद्र फडणवीस यांनी प्रत्यक्ष पाहणी केली. या दोन्ही प्रमुख शासकीय रुग्णालयांमध्ये सुरू असलेल्या कामांच्या प्रगतीवर त्यांनी समाधान व्यक्त केले, तसेच रुग्णांच्या सोयीसाठी विकासाचा वेग आणखी वाढवण्याच्या स्पष्ट सूचना प्रशासनाला दिल्या.

       नागपुरातील मेडिकल आणि मेयो या दोन महत्त्वाच्या शासकीय रुग्णालयांसाठी राज्य शासनाने मोठ्या प्रमाणावर निधी उपलब्ध करून दिला आहे. याद्वारे रुग्ण आणि त्यांच्या नातेवाईकांसाठी उच्च दर्जाच्या वैद्यकीय सुविधा निर्माण करण्याचे काम सुरू आहे. मुख्यमंत्री फडणवीस यांनी मेडिकल मधील एनआयसीयू (NICU) आणि पीआयसीयू (PICU) विभागांना भेट देऊन पाहणी केली आणि पीआयसीयूमधील नव्या व्हेंटिलेटर युनिटचे लोकार्पण त्यांच्या हस्ते पार पडले. यानंतर त्यांनी शस्त्रक्रियागृह आणि सर्जिकल आयसीयूची पाहणी करून कामाच्या गुणवत्तेचा आढावा घेतला. यावेळी अधिष्ठाता डॉ. राज गजभिये यांनी सुरू असलेल्या विकासकामांची सविस्तर माहिती मुख्यमंत्र्यांसमोर सादर केली.

या पाहणी दौऱ्या दरम्यान मुख्यमंत्र्यांनी एका संवेदनशील घटनेची दखल घेत माणुसकीचे उत्तम उदाहरण दिले. गडचिरोली जिल्ह्यातील धानोरा तालुक्यातील जपतलाई येथील आदिवासी आश्रम शाळेत घडलेल्या सर्पदंश दुर्घटनेतील एका बालिकेला उपचारासाठी नागपूरच्या मेडिकल रुग्णालयात दाखल करण्यात आले आहे. मुख्यमंत्री फडणवीस यांनी विशेष वेळ काढून या बालिकेची प्रत्यक्ष भेट घेतली आणि तिच्या आईशी संवाद साधत प्रकृतीची विचारपूस केली. तसेच, या बालिकेवर सर्वोत्तम उपचार करून तिची विशेष काळजी घेण्याचे निर्देश त्यांनी डॉक्टरांना दिले. याप्रसंगी आमदार मोहन मते, नगरसेवक रितेश गावंडे, उपअधिष्ठाता डॉ. देवेंद्र माहोरे आणि वैद्यकीय अधीक्षक डॉ. अविनाश गावंडे उपस्थित होते.

      मेडिकल मधील पाहणीनंतर मुख्यमंत्र्यांचा काफिला इंदिरा गांधी शासकीय वैद्यकीय महाविद्यालय व रुग्णालय (मेयो) येथे पोहोचला. मेयो रुग्णालयातही सध्या मोठ्या प्रमाणावर विविध पायाभूत विकासकामे सुरू आहेत. अधिष्ठाता डॉ. रवी चव्हाण यांनी त्यांचे स्वागत केले. मुख्यमंत्र्यांनी या वेळी मेयोमधील नवीन मेडिकल ब्लॉक, सर्जिकल ब्लॉक आणि शस्त्रक्रियागृहांची पाहणी करत संबंधित अधिकाऱ्यांशी सविस्तर संवाद साधला. झालेल्या कामांविषयी समाधान व्यक्त करतानाच उर्वरित कामे निर्धारित वेळेत पूर्ण करावीत, अशी सूचनाही त्यांनी केली. या उच्चस्तरीय पाहणी दौऱ्याप्रसंगी महानगरपालिका आयुक्त डॉ. विपीन इटनकर आणि जिल्हाधिकारी कुमार आशीर्वाद प्रामुख्याने उपस्थित होते.