नऱ्हे पोलिसांच्याच मिरवणुकीत ‘डीजे’चा दणदणाट; रुग्णालय परिसरात आवाजाने नागरिक संतप्त

पुणे: सण-उत्सवांच्या काळात ध्वनीप्रदूषण रोखण्यासाठी आणि सार्वजनिक शांतता राखण्यासाठी पुणे पोलीस आयुक्तांनी केलेल्या आवाहनाला स्वतः खाकी वर्दीतील कर्मचाऱ्यांनीच हरताळ फासल्याची एक धक्कादायक घटना समोर आली आहे. पुणे शहर पोलीस दलाच्या अंतर्गत येणाऱ्या नऱ्हे पोलीस ठाण्याच्या गणेशोत्सव मिरवणुकीत न्यायालयाचे नियम आणि आयुक्तांच्या आदेशांना बगल देत मोठ्या आवाजात डीजे (DJ) वाजवण्यात आल्याचा प्रकार उघडकीस आला आहे. विशेष म्हणजे, ज्या परिसरात ही मिरवणूक काढण्यात आली त्याच भागात प्रसिद्ध नवले हॉस्पिटल असून, रुग्णालयासारख्या अत्यंत संवेदनशील आणि ‘सायलेन्स झोन’ मानल्या जाणाऱ्या क्षेत्रात पोलिसांच्याच उपस्थितीत डीजेचा दणदणाट झाल्याने नागरिकांमधून तीव्र संताप व्यक्त होत आहे.

        पुणे पोलीस आयुक्त अमितेश कुमार यांनी यंदाच्या गणेशोत्सवाच्या पार्श्वभूमीवर शहरात कायदा व सुव्यवस्था अबाधित राखण्यासाठी आणि ध्वनीप्रदूषणाला आळा घालण्यासाठी सर्व गणेश मंडळांना डीजेऐवजी पारंपरिक वाद्यांचा वापर करण्याचे सक्त आवाहन केले होते. सर्वसामान्य नागरिकांना, वृद्ध व्यक्तींना आणि रुग्णालयातील रुग्णांना कर्णकर्कश आवाजाचा त्रास होऊ नये, यासाठी पोलीस प्रशासना कडून वेळोवेळी कडक मार्गदर्शक तत्त्वेही जारी करण्यात आली आहेत. मात्र, सर्वसामान्यांसाठी असणारे हे नियम खुद्द कायद्याची अंमलबजावणी करणाऱ्या यंत्रणेनेच धाब्यावर बसवल्याची चर्चा सध्या संपूर्ण पुणे शहरात रंगली आहे. नऱ्हे पोलीस ठाणे ज्या इमारतीच्या परिसरात कार्यरत आहे, त्याच भागात मोठे रुग्णालय असताना, मिरवणुकीदरम्यान पोलीस कर्मचारीच डीजेच्या तालावर ठेका धरून नाचत असल्याचा व्हिडिओ आणि वृत्त समोर आल्यानंतर सोशल मीडियावरही जोरदार टीका होत आहे. सामान्य गणेश मंडळांना नियमांचे उल्लंघन केल्यास तातडीने दंडात्मक कारवाई किंवा गुन्हे दाखल करणाऱ्या पोलिसांवर आता हाच नियम लागू होणार का, असा थेट सवाल नागरिकांकडून उपस्थित केला जात आहे.

        सामान्यांना नियम सांगणाऱ्या पोलिसांकडूनच अशा प्रकारे नियमांची पायमल्ली होत असल्याचा आरोप झाल्यानंतर अखेर प्रशासनाकडून यावर अधिकृत स्पष्टीकरण देण्यात आले आहे. नऱ्हे पोलीस ठाण्याच्या वरिष्ठ पोलीस निरीक्षक वर्षा देशमुख यांनी या संपूर्ण प्रकरणावर प्रतिक्रिया देताना स्पष्ट केले आहे की, नऱ्हे पोलीस ठाण्याच्या श्रींची मिरवणूक पूर्णपणे प्रशासकीय परवानगी घेऊन आणि सर्व शासकीय नियमांचे काटेकोर पालन करूनच पार पडली आहे. ध्वनी मर्यादेचे उल्लंघन होणार नाही याची काळजी घेत डेसिबलच्या मर्यादेत राहूनच साऊंड सिस्टीम वापरण्यात आली होती. तसेच, रुग्णालय आणि परिसरातील नागरिकांना कोणताही त्रास होणार नाही, याची पूर्ण दक्षता घेण्याचे निर्देश कर्मचाऱ्यांना देण्यात आले होते, असे त्यांनी सांगितले. एका बाजूला पोलीस आयुक्तांचे कडक निर्देश आणि शहरभर सुरू असलेली धडक कारवाई असताना, दुसरीकडे पोलिसांच्याच कार्यपद्धतीवर प्रश्नचिन्ह उपस्थित झाल्यामुळे या प्रकरणाने मोठे रूप धारण केले आहे. यावर वरिष्ठ पातळीवरून काही कारवाई होते का, याकडे आता संपूर्ण शहराचे लक्ष लागले आहे.