MPSC पेपरफुटीवरील पोस्ट महागात; हर्षवर्धन सपकाळांविरोधात गुन्हा
औसा:महाराष्ट्र लोकसेवा आयोगाच्या (MPSC) कथित पेपरफुटी प्रकरणावरून राज्याच्या राजकारणात मोठी खळबळ उडाली आहे. एमपीएससी पेपरफुटीसंदर्भात सोशल मीडियावर केलेल्या वादग्रस्त पोस्टमुळे काँग्रेसचे प्रदेशाध्यक्ष हर्षवर्धन सपकाळ (Harshwardhan Sapkal) यांच्या अडचणीत मोठी वाढ झाली असून, त्यांच्याविरोधात अधिकृतपणे गुन्हा दाखल करण्यात आला आहे. भाजपचे आक्रमक आमदार अभिमन्यू पवार यांनी दिलेल्या तक्रारीची गंभीर दखल घेत औसा पोलिसांनी ही कारवाई केली आहे, ज्यामुळे आगामी काळात सत्ताधारी आणि विरोधक यांच्यातील संघर्ष अधिक तीव्र होण्याची चिन्हे निर्माण झाली आहेत.
काही दिवसांपूर्वी MPSC अन्न आणि औषध निरीक्षक भरती प्रकरणातील कथित पेपरफुटीवरून वातावरण चांगलेच तापले होते. याच मुद्यावरून काँग्रेस प्रदेशाध्यक्ष हर्षवर्धन सपकाळ यांनी सोशल मीडिया प्लॅटफॉर्म ‘X’ वर एकापाठोपाठ एक काही पोस्ट केल्या होत्या. या पोस्टमध्ये त्यांनी, “एमपीएससी पेपरफुटी प्रकरणाचे सूत्रधार देवेंद्र फडणवीस आहेत का?,” असा सवाल उपस्थित करत, हे प्रकरण आता पुणे महानगरपालिका कार्यालयापर्यंत पोहोचल्याचा दावा केला होता. विशेषतः, या संपूर्ण प्रकरणात मुख्यमंत्र्यांचे माजी पीए आणि विद्यमान भाजप आमदार अभिमन्यू पवार यांच्यावर संशय व्यक्त केला जात असल्याची चर्चा असल्याचा दावा त्या पोस्टमध्ये करण्यात आला होता. याशिवाय, मागील काही वर्षांतील तलाठी भरती, म्हाडा, पोलीस भरती, वन विभाग भरती तसेच मेगा भरती पोर्टल घोटाळ्यांची निष्पक्ष चौकशी करण्यात यावी, अशी मागणीही त्यांनी केली होती.
हर्षवर्धन सपकाळ यांनी आपल्या सोशल मीडिया पोस्टद्वारे विनाकारण आपल्यावर संशय निर्माण करून आपली जनमानसातील प्रतिमा मलीन करण्याचा जाणीवपूर्वक प्रयत्न केल्याचा गंभीर आरोप आमदार अभिमन्यू पवार यांनी केला आहे. पेपरफुटीच्या या संपूर्ण प्रकरणाशी आपला दूरदूरपर्यंत कोणताही संबंध नसताना राजकीय द्वेषातून बदनामी केली जात असल्याचे सांगत त्यांनी पोलिसांकडे धाव घेतली. औसा पोलीस ठाण्यात यासंदर्भात औपचारिक तक्रार दाखल झाल्यानंतर पोलिसांनी कायदेशीर प्रक्रिया पूर्ण करत हर्षवर्धन सपकाळ यांच्याविरोधात गुन्हा नोंदवला आहे. या कारवाईमुळे राजकीय वर्तुळात प्रचंड तारांबळ उडाली असून, विरोधी पक्षांकडून यावर तीव्र प्रतिक्रिया उमटण्याची शक्यता आहे.
