कुख्यात गुंड गजा मारणेला मतदानासाठी दोन दिवस शहरात येण्याची उच्च न्यायालयाची परवानगी
पुणे: कोथरूड परिसरातील कुख्यात गुंड गजानन उर्फ गजा मारणे याला मुंबई उच्च न्यायालयाने मोठा दिलासा दिला आहे. आगामी महानगरपालिका निवडणुकीत मतदानाचा हक्क बजावण्यासाठी मारणेला १५ आणि १६ जानेवारी रोजी पुणे शहरात येण्याची परवानगी देण्यात आली आहे.
नेमके प्रकरण काय?
गेल्या वर्षी कोथरूडमधील भेलकेनगर येथे एका संगणक अभियंत्याला मारहाण केल्याप्रकरणी पोलीस आयुक्त अमितेश कुमार यांनी गजा मारणे आणि त्याच्या साथीदारांवर ‘मकोका’ अंतर्गत कारवाई केली होती. या प्रकरणात मारणेला जामीन मंजूर झाला होता, मात्र न्यायालयाने त्याला पुणे शहरात प्रवेश करण्यास बंदी घातली होती. सध्या तो मावळ परिसरात वास्तव्यास आहे.
पत्नी निवडणूक रिंगणात
गजा मारणेची पत्नी जयश्री मारणे या राष्ट्रवादी काँग्रेस (अजित पवार गट) पक्षाकडून कोथरूड भागातून निवडणूक लढवत आहेत. आपल्या पत्नीला मतदान करण्यासाठी आणि मतदानाचा हक्क बजावण्यासाठी मारणेने वकील ॲड. विजयसिंह ठोंबरे यांच्यामार्फत उच्च न्यायालयात अर्ज केला होता. विशेष मकोका न्यायालयाने केवळ १५ जानेवारीची परवानगी दिली होती, मात्र उच्च न्यायालयाने आता १५ आणि १६ जानेवारी असे दोन दिवस पुण्यात राहण्यास संमती दिली आहे.
पोलिसांचा कडक बंदोबस्त आणि इशारा
गजा मारणे शहरात येणार असल्याने पोलीस यंत्रणा सतर्क झाली आहे. कोथरूड भागात मारणेची दहशत असल्याने आणि त्याने काही मतदारांना संपर्क केल्याच्या तक्रारी आल्याने गुन्हे शाखेने त्याला यापूर्वीच समज दिली आहे. निवडणूक प्रक्रियेत कोणताही अडथळा किंवा कायदा-सुव्यवस्थेचा प्रश्न निर्माण झाल्यास कडक कारवाईचा इशारा पोलीस आयुक्तांनी दिला आहे. पुणे शहरातील विविध पक्षांच्या अशा ६० उमेदवारांची यादी पोलिसांनी तयार केली आहे ज्यांच्यावर गंभीर गुन्हे दाखल आहेत. या सर्वांच्या हालचालींवर पोलीस बारीक लक्ष ठेवून आहेत.
