पालिका अभियंता मारहाण प्रकरणात अनिल परब निर्दोष; मुंबई सत्र न्यायालयाचा मोठा दिलासा

मुंबई:शिवसेना (उद्धव बाळासाहेब ठाकरे) पक्षाचे वरिष्ठ नेते आणि आमदार अनिल परब यांना मुंबई सत्र न्यायालयाकडून एक मोठा आणि दिलासादायक निर्णय मिळाला आहे. बहुचर्चित अशा पालिका अभियंत्याला मारहाण प्रकरणातून अनिल परब आणि इतर आरोपींची न्यायालयाने पूर्णपणे निर्दोष मुक्तता केली आहे. जून २०२३ मध्ये वांद्रे पूर्व येथील ठाकरे गटाची शाखा पाडल्याच्या निषेधार्थ झालेल्या आंदोलनादरम्यान हा प्रकार घडला होता. या प्रकरणी वाकोला पोलीस ठाण्यात गुन्हा दाखल करण्यात आला होता, मात्र आता सत्र न्यायालयाने सबळ पुराव्या अभावी अनिल परब यांच्यासह माजी नगरसेवक सदानंद परब आणि इतर सर्व संबंधितांची निर्दोष मुक्तता करण्याचे आदेश दिले आहेत.

नेमके प्रकरण काय होते?

जून २०२३ मध्ये मुंबई महानगरपालिकेच्या प्रशासनाने वांद्रे पूर्व येथील ठाकरे पक्षाचे अधिकृत कार्यालय अनधिकृत असल्याचे कारण देत तोडले होते. या कारवाईच्या तीव्र निषेधार्थ आमदार अनिल परब आणि ठाकरे गटाच्या शेकडो कार्यकर्त्यांनी बृहन्मुंबई महानगरपालिकेच्या (BMC) ‘एच-पूर्व’ विभाग कार्यालयावर धडक मोर्चा काढला होता. अनिल परब यांच्या नेतृत्वाखाली एक शिष्टमंडळ पालिका अधिकाऱ्यांची भेट घेण्यासाठी गेले होते. त्यावेळी, पक्ष कार्यालयात छत्रपती शिवाजी महाराज आणि शिवसेनाप्रमुख हिंदुहृदयसम्राट बाळासाहेब ठाकरे यांची छायाचित्रे असतानाही, आमचे कार्यालय विनापरवानगी उद्ध्वस्त करणारे अधिकारी नेमके कोण होते? असा संतप्त सवाल परब आणि उपस्थित कार्यकर्त्यांनी केला होता.

या मोर्चानंतर पालिका कार्यालयात मोठी गरमागरम आणि तणावाचे वातावरण निर्माण झाले होते. यावेळी झालेल्या धक्काबुक्की दरम्यान पालिकेचे सहायक अभियंता (परिरक्षण) अजय पाटील यांच्यावर हल्ला करण्यात आल्याचा आणि त्यांना धमकावल्याचा आरोप ठेवण्यात आला होता. याप्रकरणी सरकारी कामात अडथळा आणल्याप्रकरणी आणि मारहाणीच्या कलमांखाली अनिल परब, सदानंद परब आणि इतर कार्यकर्त्यांवर वाकोला पोलीस ठाण्यात गुन्हा नोंदवण्यात आला होता. या प्रकरणी काही जणांना त्यावेळी अटकही करण्यात आली होती.

या प्रकरणाची सुनावणी मुंबई सत्र न्यायालयात सुरू होती. आज न्यायालयाने या खटल्याचा अंतिम निकाल देताना, पुराव्यांच्या अभावी आणि कायदेशीर बाबींचा विचार करत आमदार अनिल परब, सदानंद परब व अन्य सर्व आरोपींची या गंभीर गुन्ह्यातून निर्दोष मुक्तता केली आहे. या न्यायालयीन निर्णयामुळे ठाकरे गटाला आणि विशेषतः अनिल परब यांना मोठा दिलासा मिळाला असून राजकीय वर्तुळात या निकालाची जोरदार चर्चा रंगली आहे.