पुणे मेट्रो लाईन ३ च्या उद्घाटनाचा मार्ग मोकळा; माण-बालेवाडी पहिला टप्पा पूर्ण

पुणे: पुणेकरांची बहुप्रतिक्षित प्रतीक्षा अखेर संपत आली असून, पुणे महानगर प्रदेश विकास प्राधिकरणाच्या (PMRDA) अतिशय महत्त्वाकांक्षी अशा माण-हिंजवडी ते शिवाजीनगर मेट्रो लाईन ३ प्रकल्पातील पहिल्या टप्प्याच्या उद्घाटनाची सर्व प्रशासनिक तयारी अंतिम टप्प्यात आली आहे. या प्रकल्पांतर्गत माण ते बालेवाडी या १३ किलोमीटर लांबीच्या पहिल्या टप्प्याचे संपूर्ण काम यशस्वीरीत्या पूर्ण झाले असून, उद्घाटनाच्या अंतिम मान्यतेसाठी पुणे जिल्हा प्रशासना कडून पंतप्रधान कार्यालयाकडे (PMO) सविस्तर अहवाल सादर करण्यात आला आहे. आता केवळ पंतप्रधान नरेंद्र मोदी यांच्या वेळापत्रकाची प्रतीक्षा असून, लवकरच या नव्या मेट्रो मार्गिकेच्या उद्घाटनाची अधिकृत तारीख जाहीर होण्याची दाट शक्यता निर्माण झाली आहे.

        या प्रकल्पातील माण (मेट्रो स्टेशन क्रमांक १) ते आर. के. लक्ष्मण म्युझियम, बालेवाडी (मेट्रो स्टेशन क्रमांक १२) या पहिल्या १३ किमीच्या टप्प्याला रेल्वे सुरक्षा आयुक्तांकडून (CMRS) गत २३ जुलै रोजीच प्रवासी सेवेसाठी अधिकृत मंजुरी प्राप्त झाली होती. त्यानंतर काही दिवसांतच सेवा सुरू होणे अपेक्षित होते, परंतु विविध प्रशासकीय प्रक्रिया आणि सोपस्कारामुळे प्रत्यक्ष लोकार्पण लांबणीवर पडले. मुख्यमंत्री देवेंद्र फडणवीस यांनी पंतप्रधान नरेंद्र मोदी यांच्या सोयीनुसार वेळ निश्चित करून या महत्त्वपूर्ण मेट्रो मार्गिकेचे उद्घाटन करण्याची विनंती करणारे विशेष पत्र पंतप्रधान कार्यालयाला पाठवले होते. यानंतर पंतप्रधान कार्यालयाने राज्याच्या मुख्य सचिवांकडे पत्र पाठवून याबाबत प्रशासकीय अभिप्राय मागविला. सामान्य प्रशासन विभागाने घेतलेल्या पुढाकारानंतर पुणे जिल्हाधिकारी कार्यालयाने सर्व कायदेशीर व प्रशासकीय प्रक्रिया पूर्ण करत पीएमओला सविस्तर अहवाल पाठवून दिला आहे.

       पहिल्या टप्प्याच्या उद्घाटनाची उत्सुकता ताणलेली असतानाच, प्रशासनाने या प्रकल्पाचा विस्तार करण्याचे नियोजनही वेगाने सुरू केले आहे. माण-बालेवाडी या पहिल्या टप्प्यानंतर लगेचच शिवाजीनगरच्या दिशेने आणखी चार स्थानके प्रवाशांच्या सेवा देण्यासाठी कार्यकक्षेत घेण्याबाबत गांभीर्याने विचार सुरू आहे. या कामाला अधिक गतिमान करण्यासाठी संबंधित कंत्राटदार आणि यंत्रणेला कामाचा वेग वाढविण्याचे सक्त निर्देश पीएमआरडीए प्रशासना कडून देण्यात आले आहेत. याविषयी माहिती देताना पीएमआरडीएचे आयुक्त डॉ. अभिजित चौधरी यांनी सांगितले की, जिल्हाधिकारी कार्यालया मार्फत पंतप्रधान कार्यालयाला संपूर्ण प्रकल्पाचा अहवाल पाठवण्यात आला असून, शिवाजीनगर मार्गाच्या दिशेने काही अतिरिक्त स्थानके लवकरात लवकर सुरू करण्यासाठी युद्धपातळीवर प्रयत्न सुरू आहेत. हिंजवडीच्या आयटी हबमधील हजारो नोकरदार आणि सर्व सामान्यांचा प्रवास वाहतूक कोंडीमुक्त व अत्यंत वेगवान करणारी ही मेट्रो लाईन ३ आता प्रत्यक्षात सुरू होण्याच्या उंबरठ्यावर असल्याने संपूर्ण पुणेकरांचे लक्ष आता अधिकृत तारखेच्या घोषणेकडे लागले आहे.