पुण्यात गणेशोत्सवात डीजे-प्रेशर हॉर्नला सक्त मनाई; नियम मोडल्यास साऊंड सिस्टीम जप्त
पुणे: आगामी गणेशोत्सव आणि दहीहंडीच्या पार्श्वभूमीवर पुणे शहर पोलीस प्रशासनाने ध्वनिप्रदूषणा बाबत अत्यंत कठोर भूमिका घेतली आहे. उत्सवाच्या नावाखाली शहरात कर्णकर्कश आवाज आणि उच्चांकी डेसिबलची मर्यादा ओलांडणाऱ्यांवर कडक कायदेशीर कारवाई करण्यात येणार असून, डीजेच्या यंत्रणेतील ‘प्लाझ्मा स्पीकर’ आणि ‘प्रेशर मीड’ यांसारख्या अति तीव्र आवाज करणाऱ्या उपकरणांच्या वापरावर पूर्णपणे बंदी घालण्यात आली आहे. नियमांचे उल्लंघन केल्यास संबंधित मंडळांची संपूर्ण साऊंड सिस्टीम जप्त केली जाईल, असा स्पष्ट आणि कडक इशारा पुणे पोलीस आयुक्त अमितेशकुमार यांनी दिला आहे.
नुकतीच पुणे महानगरपालिकेत विविध प्रशासकीय विभाग, पोलीस अधिकारी आणि शहरभरातील प्रमुख गणेश मंडळांच्या प्रतिनिधींची एक महत्त्वाची समन्वय बैठक पार पडली. या बैठकीत उत्सव अत्यंत उत्साहात, आनंदात आणि पारंपारिक पद्धतीने साजरा करण्यास पोलिसांचा अजिबात विरोध नसल्याचे स्पष्ट करण्यात आलेपरंतु ध्वनि प्रदूषणाचे नियम धाब्यावर बसवून सर्वसामान्य नागरिकांच्या आरोग्याशी खेळणाऱ्यांवर कोणतीही दयामाया दाखवली जाणार नाही, असे बजावण्यात आले. गणेश मंडळांच्या प्रतिनिधींच्या वतीने काही निर्बंध शिथिल करण्याची मागणी करण्यात आली होती, मात्र पोलिसांनी सार्वजनिक सुरक्षेचा आणि शांततेचा मुद्दा समोर करत डेसिबल मर्यादेबाबत कोणतीही तडजोड केली जाणार नाही, हे स्पष्ट केले आहे. डीजेमधील ‘बेस’ आणि ‘टॉप’च्या वापरा बाबतही ठरवून दिलेल्या नियमांच्या चौकटीतच मर्यादा पाळाव्या लागणार आहेत.
पुण्याच्या गणेशोत्सवाची ऐतिहासिक आणि सांस्कृतिक ओळख कायम राखत असतानाच शहरातील ज्येष्ठ नागरिक, लहान मुले, अभ्यास करणारे विद्यार्थी आणि रुग्णालयातील रुग्णांना मोठ्या आवाजामुळे होणारा त्रास टाळणे ही सर्वांचीच नैतिक जबाबदारी असल्याचे पोलिसांनी नमूद केले आहे. ठरवून दिलेल्या डेसिबल मर्यादेचे तंतोतंत पालन करणे प्रत्येक गणेश मंडळाला बंधनकारक राहणार आहे. प्रशासनाच्या या कठोर भूमिकेमुळे यंदाचा गणेशोत्सव अधिक शिस्तबद्ध, शांततापूर्ण आणि सामाजिक भान राखणारा होईल, अशी दाट शक्यता निर्माण झाली असून, नियम तोडणाऱ्यांवर तात्काळ जप्तीची कारवाई केली जाणार असल्याने गणेश मंडळांमध्येही सतर्कतेचे वातावरण पाहायला मिळत आहे.
