मुळा मुठा नदीपात्रातील बेकायदेशीर वाळू उत्खननातील 35 लाखांचे साहित्य हस्तगत ; पुणे पोलिसांची मोठी कारवाई

     बेकायदेशीर वाळू उत्खनन करणे हा कायद्याने गुन्हा असून त्या अंतर्गत पुण्यात मोठी कारवाई करण्यात आली आहे. पुणे पोलिसांच्या गुन्हे शाखेने मुळा मुठा नदी पात्रातून अनधिकृत वाळू उपसा करणाऱ्या गुन्हेगाराविरुद्ध कारवाई केली आहे. आरोपीचे नाव पंकज सदाशिव गायकवाड (वय 38) असून तो हवेली तालुक्यातील कोळवाडी येथील रहिवासी आहे. पोलिसांनी आरोपीसह त्याच्या साथीदारांना देखील ताब्यात घेतले आहे तसेच त्यांच्याकडून अंदाजे रु 35 लाखाचे साहित्य जप्त केले आहे.

     पोलिसांनी दिलेल्या माहितीनुसार, लोणी काळभोर पोलीस ठाण्याच्या हद्दीतील थेऊर आणि कोळवाडी दरम्यान नदीच्या पट्ट्यात  बेकायदेशीर वाळू उत्खनन सुरु असल्याची माहिती गुन्हे शाखेला मिळताच त्यांनी नदीच्या भागात गस्त घालण्यास सुरुवात केली. या कारवाईचे नेतृत्व पोलीस निरीक्षक वाहिद पठाण यांनी केले. गस्ती दरम्यान संशयीतांना पळून जाण्यापासून रोखण्यासाठी जलद कारवाई करण्यात आली.गस्तीच्या वेळी पोलिसांना कोळवाडीतील शितोळे वस्तीजवळ नदी पात्रात बेकायदेशीर चालणारे एक उत्खनन यंत्र व ट्रॅक्टर आढळला. त्याठिकाणी पोलिसांनी छापा टाकला व पंकज आणि त्याच्या साथीदारांना ताब्यात घेतले. 

पंकज वर यापूर्वी दाखल झालेले गुन्हे

1 पंकज गायकवाड हा वारंवार गुन्हे करणारा गुन्हेगार असून त्याच्यावर कोंढवा, पौंड, लोणी काळभोर, हडपसर येथे गुन्हे दाखल 

2. 2 वर्षांसाठी तडीपार करण्यात आले होते.

3. सध्या खाण खनिजे विकास व नियमन या कायद्या अंतर्गत लोणी काळभोर पोलीस ठाण्यात एक नवीन गुन्हा दाखल करण्यात आला आहे.

ही कारवाई अतिरिक्त पोलीस आयुक्त शैलेश बलकवडे, उपायुक्त निखिल पिंगळे, आणि सहाय्यक आयुक्त राजेंद्र मुळीक यांच्यासह वरिष्ठ अधिकाऱ्यांच्या देखरेखीखाली करण्यात आली. तसेच एपीआय मदन कांबळे, पोलीस निरीक्षक वाहिद पठाण, पीएसआय रामकृष्ण दळवी आणि इतर गुन्हे शाखेच्या युनिट मधील कर्मचाऱ्यांचा समावेश होता.

पोलिसांनी हस्तगत केलेले साहित्य

एक उत्खनन यंत्र किंमत 25 लाख रुपये

8 ब्रास बेकायदेशीर काढलेली वाळू किंमत 40,000 रुपये

ट्रॉली असणारे 2 ट्रॅक्टर किंमत 10 लाख रुपये