महाराष्ट्रातील शासकीय आश्रमशाळांमध्ये २ हजार ४२१ शिक्षक पदांची मेगाभरती जाहीर

मुंबई: राज्यातील शिक्षण क्षेत्राच्या प्रतीक्षेत असलेली एक अत्यंत महत्त्वाची आणि आनंदाची बातमी समोर आली आहे. महाराष्ट्र शासनाच्या आदिवासी विकास विभागांतर्गत कार्यरत असलेल्या शासकीय आश्रम शाळांमधील शिक्षकांच्या रिक्त जागा भरण्यासाठी एका मोठ्या मेगा भरतीची घोषणा करण्यात आली आहे. ‘पवित्र’ पोर्टलच्या माध्यमातून वर्ग ३ संवर्गातील प्राथमिक, माध्यमिक आणि उच्च माध्यमिक शिक्षक (शिक्षण सेवक) अशा एकूण २ हजार ४२१ रिक्त पदांवर ही भरती प्रक्रिया राबविली जात आहे. या भरतीमुळे राज्यातील हजारो पात्रता धारक आणि बेरोजगार तरुण-तरुणींना शासकीय सेवेत रुजू होण्याची सुवर्णसंधी उपलब्ध झाली आहे.

       आदिवासी विकास विभागाच्या अखत्यारीतील नाशिक, ठाणे, अमरावती आणि नागपूर या प्रमुख विभागांमधील शासकीय आश्रम शाळांमधील रिक्त जागांसाठी ही मोहीम सुरू करण्यात आली आहे. यामध्ये सर्वाधिक ८२६ जागा एकट्या नाशिक विभागात भरल्या जाणार आहेत, तर ठाणे विभागात ६१३, नागपूर विभागात ५१४ आणि अमरावती विभागात ४६८ रिक्त पदांवर शिक्षक नियुक्त केले जाणार आहेत. या भरतीमध्ये प्राथमिक शिक्षक (मराठी व इंग्रजी माध्यम), माध्यमिक शिक्षक (मराठी व इंग्रजी माध्यम) तसेच उच्च माध्यमिक स्तरावरील शिक्षक (शिक्षण सेवक) अशा विविध पदांचा समावेश असल्यामुळे उमेदवारांना त्यांच्या शैक्षणिक पात्रतेनुसार मोठा वाव मिळाला आहे.

     स्थानिक व आदिवासी क्षेत्रांना योग्य तो न्याय आणि प्राधान्य मिळावे, यासाठी या संपूर्ण प्रक्रियेत पेसा (Pesa) आणि नॉन-पेसा (Non-Pesa) क्षेत्रांचे अत्यंत स्पष्ट विभाजन करण्यात आले आहे. यानुसार संपूर्ण भरतीमध्ये पेसा क्षेत्रासाठी ८८५ जागा तर नॉन-पेसा क्षेत्रासाठी १ हजार ५३६ जागा राखीव ठेवण्यात आल्या आहेत. प्राथमिक आणि माध्यमिक स्तरावर मराठी व इंग्रजी माध्यमाच्या शेकडो जागांवर ही भरती होत आहे. तसेच, उच्च माध्यमिक स्तरावर मराठी, इंग्रजी, इतिहास, राज्यशास्त्र, भूगोल, अर्थशास्त्र, गणित, जीवशास्त्र, रसायनशास्त्र आणि भौतिकशास्त्र या विविध विषयांच्या शाखांसाठी एकूण ३५७ जागा उपलब्ध करून देण्यात आल्या आहेत.

          ही संपूर्ण भरती प्रक्रिया शासनाच्या ‘पवित्र’ पोर्टलद्वारे अत्यंत पारदर्शक पणे आणि केवळ गुणवत्तेच्या निकषावरच पार पडत आहे. त्यामुळे उमेदवारांनी कोणत्याही प्रकारच्या अफवांवर किंवा दिशाभूल करणाऱ्या माहितीवर विश्वास ठेऊ नये, असे स्पष्ट आवाहन आदिवासी विकास विभागाच्या आयुक्त लीना बनसोड यांनी केले आहे. या व्यापक शिक्षक भरतीमुळे आश्रम शाळांमधील शिक्षकांची दीर्घकाळ प्रलंबित असलेली रिक्त पदे भरली जातील, ज्यामुळे आदिवासी व ग्रामीण भागातील विद्यार्थ्यांच्या दर्जेदार शिक्षणाला अधिक गती मिळण्यास मदत होईल.