फेब्रुवारीतच उन्हाचा तडाखा: पुण्यात राज्यातील सर्वाधिक तापमानाची नोंद

   फेब्रुवारीच्या दुसऱ्या आठवड्यात महाराष्ट्रात उष्णतेची लाट जाणवू लागली असून, पुणे हे राज्यातील सर्वाधिक तापमान नोंदवलेले शहर ठरले आहे. कोरेगाव पार्क येथे 9 फेब्रुवारी रोजी कमाल तापमान 37 अंश सेल्सिअस नोंदवले गेले, जे राज्यातील उच्चांकी तापमान ठरले आहे.

 थंडी नाही, उन्हाचा चटका वाढला

यंदा पुण्यात हिवाळ्यातील गारवा फारसा जाणवला नाही. जानेवारी महिन्यात अपेक्षेपेक्षा कमी थंडी होती आणि फेब्रुवारीच्या सुरुवातीलाच उन्हाचा चटका वाढू लागला. 1 फेब्रुवारीला कोरेगाव पार्क येथे कमाल तापमान 31.5 अंश सेल्सिअस होते, मात्र 8 फेब्रुवारीला ते 37 अंश सेल्सिअसपर्यंत पोहोचले.

 राज्यात उष्णतेचा प्रभाव वाढला

गेल्या 48 तासांत महाराष्ट्रातील अनेक शहरांत तापमानाचा आलेख वेगाने वर गेला आहे. पुण्यासह सोलापूर, वर्धा, अकोला, अमरावती आणि बुलढाणा ही तापमानवाढीच्या यादीत आहेत. हवामान तज्ज्ञांच्या मते, शहरीकरण, वाढते प्रदूषण आणि कोरड्या वाऱ्यांमुळे तापमान झपाट्याने वाढत आहे.

 फेब्रुवारीतच एप्रिलसारखा उन्हाळा

पुण्यातील नागरिक उष्णतेने त्रस्त झाले असून, फेब्रुवारीतच उन्हाळा जाणवत आहे. वातावरणातील उष्णता आणि उकाड्यामुळे दिवसाढवळ्या बाहेर पडणे कठीण होत आहे. नोव्हेंबर ते जानेवारी या हिवाळी महिन्यांमध्ये थंडीची कमी नोंद झाली आणि आता फेब्रुवारीतच उन्हाचा जोर वाढल्याने नागरिक हैराण झाले आहेत.

 उन्हापासून संरक्षण गरजेचे

तापमान वाढत असल्याने नागरिकांनी उष्णतेपासून बचाव करावा. शक्यतो दुपारी बाहेर जाणे टाळावे, पुरेसे पाणी प्यावे आणि थंड पदार्थांचे सेवन करावे, असा सल्ला हवामान तज्ज्ञ देत आहेत. पुढील काही दिवस उन्हाचा जोर कायम राहण्याची शक्यता असल्याने नागरिकांनी आवश्यक काळजी घेण्याचे आवाहन करण्यात आले आहे.