माणमधील नुकसानग्रस्तांना ना. गोरेंच्या प्रयत्नाने त्वरित मदत

   माण तालुक्यात अवकाळी पावसाने नुकसान झालेल्या शेतकऱ्यांना व पळशी येथील नदीत वाहून गेलेल्या युवकाच्या वारसांना शासनाच्या माध्यमातून ग्रामविकास मंत्री जयकुमार गोरे यांनी आर्थिक मदत केली.माण तालुक्यात मे मध्ये अवकाळी पावसाने अनेक गावात मोठे नुकसान झाले. या नुकसानीत काही घरांची पडझड झाली तर काही ठिकाणी गुरे वाहून गेली. तर काही ठिकाणी गुरांचा मृत्यू झाल्याच्या घटना घडल्या होत्या. ग्रामविकास मंत्री जयकुमार गोरे यांनी मंत्रालयातून काही नुकसानग्रस्तांना तातडीने पाच लाख सत्तर हजारांची मदत मिळवून दिली.

        यामध्ये पळशी येथे माणगंगा नदीला आलेल्या पुरात वाहून गेलेल्या नवनाथ कोंडिबा पाटोळे या तरुणाच्या घरची परिस्थिती अत्यंत गरिबीची होती. ना.जयकुमार गोरे यांनी नवनाथ पाटोळे यांच्या पत्नी माधुरी पाटोळे यांना चार लाख रुपये आर्थिक मदतीचा धनादेश दिला. त्याचबरोबर कुरणेवाडी येथील सुभाष आटपाडकर यांना ५७ हजारांचा धनादेश देण्यात आला. त्यांची एक म्हैस व एक वासरू दगावले होते. तसेच पळसावडे येथील भाऊसाहेब धुलगुडे यांची एक म्हैस दगावली होती. त्यांना ३७ हजार पाचशे रुपयांचा धनादेश देण्यात आला.