स्वस्त घराचे आमिष दाखवून ५१ जणांची फसवणूक; पुण्यात ८९ लाखांचा घोटाळा, १३ जणांवर गुन्हा

पुणे: स्वस्त आणि किफायतशीर दरात हक्काचे घर किंवा मोकळा प्लॉट मिळण्याचे आमिष दाखवून सर्वसामान्य नागरिकांची आर्थिक फसवणूक करणाऱ्या फसव्या गृहप्रकल्पांचे जाळे पुण्यात पुन्हा एकदा उघडकीस आले आहे. सोशल मीडियावर आकर्षक जाहिराती करून ‘कात्रज व्हॅली’ या प्रोजेक्टमध्ये फ्लॅट बुकिंगच्या नावाखाली तब्बल ५१ नागरिकांची ८९ लाख ७ हजार रुपयांची फसवणूक केल्याप्रकरणी इन्फ्राटेक कंपनीचा मुख्य मालक आणि संचालक किसन धावजी राठोडसह १३ जणांवर भारती विद्यापीठ पोलीस ठाण्यात गंभीर गुन्हे दाखल करण्यात आले आहेत. या धडाकेबाज कारवाईमुळे पुणे शहरातील बोगस रिअल इस्टेट कंपन्यांच्या गैरव्यवहारांचे बिंग फुटले असून, नागरिक वर्तुळात एकच खळबळ उडाली आहे.

         याप्रकरणी वंदना ज्ञानदेव खंदारे (वय ३८, रा. अप्पर ओटा, इंदिरानगर, बिबवेवाडी) यांनी अधिकृत फिर्याद दिली आहे. फिर्यादी वंदना खंदारे या परिचारिका (नर्स) म्हणून काम करत असून, त्यांना स्वतःच्या मालकीचे हक्काचे घर असावे अशी तीव्र इच्छा होती. जुलै २०२३ मध्ये त्यांनी सोशल मीडियावर इन्फ्राटेक कंपनीतर्फे ‘कात्रज व्हॅली’ या प्रकल्पाची जाहिरात पाहिली, ज्यामध्ये अत्यंत स्वस्त दरात फ्लॅट उपलब्ध करून देण्याचे दावे करण्यात आले होते. त्यांनी नमूद केलेल्या क्रमांकावर संपर्क साधल्यावर कंपनीचा मॅनेजर अमोल गोरे याने त्यांना मांगडेवाडी येथील कार्यालयात बोलावून घेतले. तेथे ८ लाख ते १४ लाख रुपयांच्या फ्लॅटचे स्वप्न दाखवून त्यांच्याकडून २ लाख रुपयांची रक्कम बुकिंगच्या स्वरूपात भरून घेण्यात आली. त्यानंतर कंपनीच्या वतीने चैत्राली दहिवाल हिने त्यांच्या सोबत कायदेशीर स्वरूपाचा समजुतीचा करारनामा केला, तर सागर गोळे व अमोल गोरे यांनी पुढील सहा महिन्यांत कात्रज व्हॅली प्रकल्पाचे भूमीपूजन करून फ्लॅटचा ताबा  दिला जाईल, असा पूर्ण विश्वास संपादन केला होता.

           मात्र, ठरलेली मुदत संपून तब्बल सहा महिने उलटून गेल्यानंतरही प्रकल्पाच्या ठिकाणी कोणत्याही प्रकारच्या बांधकामाची हलचाल किंवा सुरुवात झाली नसल्याचे निदर्शनास आले. चिंतेत पडलेल्या खंदारे यांनी मांगडेवाडी येथील इन्फ्राटेकच्या कार्यालयात धाव घेऊन चौकशी केली असता, त्यांना कंपनीच्या कर्मचाऱ्यांकडून केवळ उडवाउडवीची आणि अरेरावीची उत्तरे देण्यात आली. याच दरम्यान, कंपनीने अशाच प्रकारे अनेक नागरिकांची फसवणूक केल्याचे आणि इतर लोकही आपले पैसे परत घेण्यासाठी कार्यालयात फेऱ्या मारत असल्याची धक्कादायक माहिती त्यांना मिळाली. जेव्हा त्यांनी आपले बुकिंग रद्द करून भरलेली रक्कम परत मागितली, तेव्हा मॅनेजर अमोल गोरे, चैत्राली दहिवाल आणि सागर गोळे यांनी कंपनीतील नोकरी सोडल्याचे सांगून हात वर केले. तिथे उपस्थित असलेल्या इतर स्टाफनेही “आम्ही तुमचे पैसे घेतलेले नाहीत, तुम्हाला काय करायचे ते करा,” अशी धमकी देत उर्मट वर्तन केले.

           फसवणूक झाल्याचे स्पष्ट झाल्यानंतर पीडित महिलेने इतर नागरिकांच्या मदतीने तातडीने भारती विद्यापीठ पोलीस ठाण्यात धाव घेत सविस्तर फिर्याद दाखल केली. पोलिसांनी या प्रकरणाची सखोल चौकशी केली असता, या कंपनीने केवळ खंदारेच नव्हे, तर तब्बल ५१ नागरिकांची अशाच प्रकारे दिशाभूल करून ८९ लाख ७ हजार रुपयांची मोठी लाट मारल्याचे निष्पन्न झाले. या गुन्ह्यात इन्फ्राटेक कंपनीचा मालक किसन धावजी राठोड (Kisan Dhavji Rathod) याच्यासह सुशालीनी किसन राठोड, शिवकन्या राठोड (रा. कौडगाव हुडा, बीड), प्रणवी भागवत आणेराव (रा. कात्रज), चैत्राली विशाल दहिवाल (रा. धायरी), संजना राठोड (रा. हडपसर), अनिल शंकर देशमुख (रा. धायरी फाटा), हनुमंत बाळू गोरे (रा. रहाटवडे, कोंढणपूर), राजेश रंगराव काकडे (रा. नांदेड सिटी), बाळासाहेब कोंडिबा घोगरे (रा. मानाजीनगर, नर्‍हे), अभिषेक चंद्रशेखर सासवडे (रा. वारजे माळवाडी), सागर गोळे आणि अमोल गोरे या १३ जणांविरुद्ध कायदेशीर गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक पाटील यांच्या मार्फत अत्यंत कसून केला जात असून, या बनावट रॅकेटमागील इतर साथीदारांचा शोध घेतला जात आहे.