पुणे : पुण्यातील खराडी परिसरात एका २२ वर्षीय तरुणाला ड्रग्जच्या खोट्या प्रकरणात अडकवण्याची धमकी देऊन पैशांची मागणी केल्याचा आरोप करण्यात आला आहे. याप्रकरणी खराडी पोलीस ठाण्यात दोन अज्ञात व्यक्तींविरोधात तक्रार नोंदवण्यात आली आहे . वारंवार फोन करून मानसिक त्रास दिल्याने संबंधित तरुणाला आत्महत्येस प्रवृत्त केल्याचाही आरोप  करण्यात आला आहे.

मिळालेल्या माहितीनुसार, २९ सप्टेंबर २०२६ ते १ ऑक्टोबर २०२६ या कालावधीत पहाटे साडेसहा वाजण्याच्या सुमारास खराडी येथील रिव्हरडेल सोसायटीच्या इमारतीशी संबंधित हा प्रकार घडल्याचे नमूद आहे. तक्रारदाराच्या मुलाचे नाव शिखर कुमार गौरव सक्सेना असून त्याचे वय २२ वर्षे आहे.

दोन अज्ञात व्यक्तींनी तरुणाला ड्रग्जच्या खोट्या प्रकरणात अडकवण्याची भीती घातली. तसेच, वारंवार फोन करून पैशांची मागणी केल्याचा आणि त्याला मानसिक त्रास दिल्याचा आरोप करण्यात आला आहे. या कथित प्रकारामुळे तरुणाला आत्महत्येस प्रवृत्त केल्याचेही तक्रारीत म्हटले आहे.या प्रकरणी भारतीय न्याय संहितेतील कलम १०८, ३०८(६), ३५१(४) आणि ३(५) यांचा उल्लेख  करण्यात आला आहे.

दरम्यान, या प्रकरणातील आरोपांची सत्यता, संबंधित व्यक्तींची ओळख पोलिसांच्या तपासातून समोर येतील.  या प्रकरणाचा पुढील तपास पोलीस उपनिरीक्षक संतोष म्हेत्रे करत आहेत.